nitre nitré

Voyez Salpestre, c'est la même chose, quoy que quelques-uns le tiennent beaucoup different, & disent que c'est une espece de sel particulier. Le nitre des Anciens estoit tout fossile & mineral. Ils en faisoient quatre especes, qui n'estoient differentes que par les noms des lieux d'où on les tiroit, l'Armenien, le Romain, l'Africain, qu'on appelloit autrement aphronitre, qu'Avicenne appelle baurach ; & enfin l'Egyptien, qui estoit le plus fameux, & prenoit son nom de Nitria, certaine region d'Egypte où il croissoit en abondance. Serapion dit que les mines de nitre estoient semblables à celles du sel commun, & que c'estoient de l'eau coulante qui se congeloit comme une pierre vulgaire, d'où luy a esté donné le nom de Salpestre. Il adjouste, que le nitre estoit de plusieurs couleurs, sçavoir blanc, rouge, roux, livide ou plombé, & d'autre teinture ; qu'il estoit même different en forme ; que l'un estoit caverneux comme une esponge ; l'autre ferme & solide ; l'autre luisant & diaphane comme verre, l'autre se levoit par filets & par feuilles. Mais quoy que les Auteurs soient differents sur ce sujet, il est certain que les Anciens n'ont point eu de nitre artificiel comme est nostre salpestre. En Latin nitrum. Les Chymistes reconnoissent une escume de nitre, qu'ils appellent spuma nitri.