lambrequin

Terme de Blason. Quelques-uns disent lamequin, & d'autres lambequin. C'estoit l'ancienne couverture des casques, comme la cotte d'armes estoit celle du reste de l'armure, qui les préservoit de la chaleur, de la pluye, de la poudre, & qui faisoit reconnoistre les Chevaliers dans la meslée. Ils estoient d'estoffe, & servoient à soustenir & à lier les cimiers qui estoient de plumes. Les lambrequins formez de feuillages, entermeslez les uns dans les autres sont plus nobles que ceux qui sont composez de plumes naturelles.Quelques-uns les ont aussi appellez feuillarts, parce qu'ils ressembloient aucunement à des feuilles d'acanthe. Ils ont esté quelquefois mis sur le casque en forme de bonnet eslevé comme celuy du Doge ; & leur origine vient des anciens chapperons, qui servoient autrefois de coëffure tant aux hommes qu'aux femmes.Le fond & le gros du corps des lambrequins doivent estre de l'esmail du fond & du champ de l'Escu ; mais leurs bords doivent estre de ses autres esmaux. Quelques Herauts ont appellé volet, cet habillement du casque, lors qu'il estoit leger, parce qu'il volletoit au gré du vent, & n'y estoit attaché qu'avec un tortil ou bourlet composé de cordons & de rubans éntrelacez des couleurs & metaux des armes du chevalier. D'autres luy ont donné le nom de capeline, quand il estoit fait en maniere de cappes, d'ou est venu un ancien proverbe militaire. Homme de capeline, pour dire, resolu & determiné au combat. On la aussi appelle mantelet, quand il estoit large & court, & enveloppoit le casque & l'Escu : ce qui le faisoit appeller par quelques-uns camail. On croit que les lambrequins ont esté ainsi nommez, parce qu'ils pendoient en lambeaux, & estoient tout hachez à cause des coups qu'ils avoient receus dans les batailles. Mais le Pere Menestrier pretend que ce mot vient du Latin lemniscus, qui signifie ces rubans volants dont les couronnes des Anciens estoient attachées.