ôter s'ôter

Transporter une chose d'un lieu à un autre. Ostez cet enfant de la voye des carrosses. Faites oster ces platras qui encombrent les passages. Un Garde est venu qui la fait oster de la place où il estoit. Ostez vous de devant mes yeux, je ne vous puis souffrir. Ce mot vient du Latin corrompu hostare, qui a esté fait de haurire. Menage.OSTER, signifie aussi, Soustraire, retrancher, diminuer. La seconde regle d'Arithmetique enseigne à oster un petit nombre d'un plus grand. Il faut oster trois doigts des costez en cette table, pour la rendre quarrée. Il faut oster, retrancher ces gros chesnes qui offusquent ce taillis. Il faut oster du bois, quand le feu est trop grand. Je m'aperçois qu'on a bien osté de mon bled, de mon argent. Chaque jour oste quelque chose de nostre vie. Cette montagne oste la veuë de ce chasteau.OSTER, signifie encore, arracher, enlever ou par violence, ou par des remedes. On luy a osté tout son bien, on luy a osté jusqu'à sa chemise. On luy a oste la teste de dessus les espaules, il a esté decapité. On luy a osté une louppe de la teste, une taye de dessus l'oeuil, osté les bourgeons du visage. Ce remede luy a osté sa migraine, son mal de coeur.OSTER, se dit figurément en choses morales. Si vous luy ostez l'honneur, vous luy ostez la vie. Si vous luy ostez sa femme, vous luy ostez toute sa consolation. On ne luy sçauroit oster cette opinion de l'esprit, oster cet affront de sa memoire. Une violente passion d'amour oste la liberté, oste la connoissance, le jugement.OSTER le chapeau à quelqu'un, c'est le saluer avec civilité, se descouvrir pour luy faire honneur. Il faut oster son chapeau dans l'Eglise, chez le Roy, à la rencontre des amis, ou des superieurs.On dit proverbialement, Ostez cela de vos papiers, pour dire, N'ayez pas cette opinion, ne croyez pas que cela vous soit deu.OSTÉ, ÉE. part. & adj.