vrai

Qui contient verité, qui est conforme à la chose dont on parle. Il n'y a que les Chrêtiens qui adorent le vray Dieu. JESUS-CHRIST est vray Dieu & vray homme. On a trouvé la vraye croix sur laquelle il a souffert mort & passion. Le vray bien, le vray repos de l'ame ne se trouve que dans la vertu.VRAY, se dit aussi de ce qui est pur, ou dans son degré de perfection. Il est opposé à corrompu, meslé, contrefait. De vray or, de vray argent, qui n'est point meslangé, alteré. De vrais diamants, de vrais rubis, de vrayes perles, qui ne sont point contrefaites.VRAY, se dit aussi par comparaison des choses qui se rapportent, quand on les confere. Voilà son vray portrait, sa vraye parole, sa vraye humeur. Cette copie est vraye, cette citation est vraye, je les ay conferées à l'original. C'est son vray nom, son nom de famille.VRAY. subst. masc. se dit aussi par opposition à faux. Les Philosophes, les Juges ont bien du mal à discerner le vray d'avec le faux. L'entendement ne desire que le vray, se porte au vray. On dit, Avoüez le vray, dites le vray, c'est à dire, la verité. Voilà le vray de l'affaire, la verité constante & secrette.VRAY, se dit encore de ce qui convient, qui est propre. C'est son vray fait que cet habit. C'est son vray balot. C'estoit là le vray lieu, la vraye occasion de faire voir son esprit, son adresse. C'est le vray motif de son entreprise.VRAY, se met quelquefois pour augmenter la force du mot. C'est un vray Satan. C'est un vray fou. C'est un vray je ne sçay qui. C'est un vray charlatan, pour dire, qui imite bien les charlatans. On dit aussi un vray Poëte, non seulement pour marquer un homme qui a du genie à la Poësie, mais aussi ironiquement pour dire, qu'il a toutes les qualitez d'un mauvais Poëte, qu'il est crotté, malpropre, qu'il est distrait, qu'il importune du recit de ses vers. On dit aussi en bonne part, C'est un vray pere, c'est un vray amy, pour dire, il a la tendresse d'un pere, l'affection d'un amy.VRAY, se dit proverbialement en ces phrases. Cela est vray, ou le Roy n'est pas noble. On dit par maniere de serment, Aussi vray qu'il n'y a qu'un Dieu, aussi vray que l'Evangile, aussi vray qu'il faut mourir ; & ironiquement, Aussi vray qu'il neige.AU VRAY. adv. D'une maniere vraye. Dites nous au vray ce qui en est, sans rien desguiser, sincerement. On dit aussi, A vray dire, quand on reconnoist la verité.ESTAT AU VRAY. Terme de Finance. C'est l'estat arresté au Conseil, qu'on envoye aux Receveurs, qui ordonne des payements qu'ils doivent faire, & sur lequel ils comptent à la Chambre.