enivrer

Rendre yvre, troubler le cerveau, luy empêcher ses fonctions. Le cidre, la biere, enyvrent plus fortement que le vin, & pour plus long-temps. Le pain où il y a de l'yvroye enyvre. Le vin qu'on foule dans la cuve enyvre. La coque de levant enyvre les poissons, & il est deffendu par les Ordonnances de s'en servir pour pescher.ENYVRER, signifie aussi, Faire boire un autre jusqu'à ce qu'il ait perdu la raison. Les Allemans sont grands buveurs, mais il y a des François qui les ont enyvrez. Les vieillards sont faciles à enyvrer, un verre de vin les enyvre. Ce mot vient du Latin inebriare.ENYVRER, signifie aussi, Estourdir. Ces cloches, ces carrosses font un si grand bruit, que cela m'enyvre, que j'en suis tout enyvré.ENYVRER, se dit figurément en Morale. Les gens qui ont de la vanité s'enyvrent aisément par la flatterie. La bonne fortune enyvre les sots, leur fait perdre la raison.On dit proverbialement, qu'un homme s'enyvre de son vin, tant au propre, quand il boit tout seul & par excés ; qu'au figuré, quand il a trop bonne opinion de luy-même.ENYVRÉ, ÉE. part. & adj.