légitime

Qui est selon les loix divines & humaines. Un Prince legitime est celuy qui est venu par eslection ou succession. Une autorité legitime, celle qui est emanée de celuy qui a le pouvoir de la donner. Un enfant legitime, qui est né en legitime mariage celebré selon les loix du pays. Une action legitime, qui est faite selon les loix, le droit & la raison. Un interest legitime est celuy qui est au taux du Roy. Les Medecins appellent un enfantement legitime, celuy qui vient justement à son terme, & illegitime, celuy qui vient ou plustost, ou plus tard, comme celuy de 8. mois.LEGITIME. s. f. Droit que la loy donne aux enfans sur les biens de leurs pere & mere, & qui leur est acquis, ensorte qu'on ne les en peut priver par une disposition contraire. La legitime des enfans selon la Coustume de Paris, est la moitié de ce que chacun auroit eu ab intestat. En Droit, c'est tantost le tiers, tantost la moitié, selon le nombre des enfans. Les ascendans peuvent aussi demander leur legitime sur les biens de leurs enfans decedez. Les Patrons à Rome avoient aussi une legitime sur les biens de leurs affranchis.Un enfant peut demander sa legitime ou un supplement de legitime à son frere, que ses pere & mere auront trop advantagé.