foi

Don de Dieu qui nous fait croire fermement les veritez qu'il a revelées à son Eglise. S. Paul dit que c'est le fondement des choses que l'on espere, & une preuve certaine de ce qui ne se voit point. aux Hebr. chap. 11. vers. 1. La foy est la premiere des Vertus Theologales. si on avoit de la vraye foy gros comme un grain de moutarde, on transporteroit les montagnes dans la mer, dit le Sauveur. Pour estre sauvé, il faut vivre & mourir dans la foy.On appelle, Foy divine, toutes les veritez qui sont contenuës dans l'Escriture.FOY HUMAINE, est la creance qu'on donne aux paroles des hommes. Il faut toûjours entretenir tout ce qui a esté fait sous la foy publique. les Peres sont des Auteurs dignes de foy. Profession de Foy, est une formule qui contient tous les articles de la croyance de l'Eglise, qu'on fait lire & jurer à ceux qui abjurent l'heresie, ou à ceux qui entrent en quelques dignitez Ecclesiastiques. Le Symbole de la foy, c'est le Credo ou le Symbole des Apostres.FOY, signifie encore, Serment, parole qu'on donne de faire quelque chose, & qu'on promet d'executer. Dans les anciens Edits on en promettoit l'execution en foy & parole de Roy. la foy de Gentil-homme, la foy de Marchand estoient autrefois fort en credit. les Carthaginois renvoyerent Attilius Regulus sur sa foy, & il revint se remettre prisonnier. Par vostre foy le croyez-vous ? Il en a juré sa foy.On dit aussi, Laisser un homme sur sa foy, pour dire, l'abandonner à sa conduitte. On le dit aussi d'un cheval qu'on laisse en liberté d'aller paistre où il voudra.La foy conjugale, est la foy que le mari & la femme se donnent en se mariant. On appelle aussi une foy, la representation de deux mains jointes ensemble, qui sont un tesmoignage de foy.En termes de Jurisprudence, on dit qu'il y a des contracts de bonne foy, comme les ventes, eschanges, loüages & autres, où l'on se confie à la probité des contractans, & dont on interprete favorablement les intentions ; d'autres qui sont de droit estroit, & qu'on doit executer à la rigueur. La prescription n'a lieu, que lors qu'on possede de bonne foy.On dit aussi, qu'une piece revestuë de ses formes fait foy, pour dire, qu'on y adjouste foy en Justice, qu'on croit à son tesmoignage. en foy de quoy on a fait apposer le scel à ces presentes.On dit aussi, un homme de foy, pour dire, un vassal qui a fait la foy & hommage ou serment de fidelité à son Seigneur pour un fief qu'il tient de luy à cette condition. On dit en Fauconnerie, qu'on laisse aller un oiseau sur sa foy, lors qu'on ne luy donne plus de filiere, & qu'on le reclame en liberté.On appelle aussi Foy en termes de Blason, deux mains jointes ensemble. Il portoit de gueules à la foy d'argent.EN BONNE FOY, adv. De bonne foy. Sincerement. En bonne foy, croyez-vous cette extravagance ?On dit proverbialement, qu'un homme est fait à la bonne foy, ou vit bien à la bonne foy, pour dire, qu'il est bien niais de croire aux apparences, ou à tous ceux qui luy donnent des paroles, qui croit tout ce qu'on luy dit. On dit d'un meschant homme, qu'il n'a ni foy, ni loy.