fouetter

Donner des coups de foüet. Un bon Cocher ne doit gueres foüetter ses chevaux. les escoliers qu'on foüette trop s'endurcissent aux coups. On dit aux petits escoliers, qu'ils aillent à l'escole foüetter le maistre.On dit aussi en Maçonnerie, Foüetter le plastre, pour dire, le jetter contre un mur par aspersion avec un balay, au lieu de le plaquer avec la truelle.FOÜETTER, se dit aussi d'un vent impetueux, qui en singlant couppe le visage, & y fait des impressions semblables aux coups de foüet. dans les destroits des montagnes le vent y foüette cruellement.On le dit aussi des canons & des armes à feu. Il y avoit des canons sur un cavalier qui foüettoient dans la campagne, & qui empeschoient les approches.Les Grecs ont dit figurément, que Xerxes avoit foüetté la mer, pour dire, qu'il l'avoit domptée, & qu'il y avoit jetté plusieurs chaisnes.On dit proverbialement, Il n'y a pas de quoy foüetter un chat, pour dire, qu'une faute ou une accusation sont legeres.FOÜETTÉ, ÉE. part. & adj. On appelle par ironie, un escolier qui a eu le foüet, cul foüetté. On dit, qu'un pays est foüetté, qu'il est foüetté du mauvais vent, pour dire, qu'on n'y recueillera point de fruits dans l'année.On appelle de la cresme foüettée, celle qu'on a fait eslever en l'air à force de la foüetter ; & figurément on appelle Cresme foüettée, les choses qui ont belle apparence, & qui ne sont rien en effet.On appelle en termes de Jardinage, une tulippe fouettée, quand elle est marquée de petites rayes, particulierement de rouge sur le blanc, qui ressemblent aux marques des coups de foüet. On le dit aussi des oeuillets & des autres fleurs.