seigneur

Qui est maistre, qui commande. Quand il se dit absolument, il ne se dit que de Dieu. Seigneur, ayez pitié de nous. Nostre Seigneur JESUS-CHRIST. Voilà Nostre Seigneur qui passe. Le corps de Nostre Seigneur. On va porter Nostre Seigneur à ce malade. Le Seigneur soit avec nous. Beny soit le Seigneur en ses oeuvres. Ce fut Enos qui invoqua le premier le nom du Seigneur.SEIGNEUR, se dit aussi des Puissances temporelles. Le Roy est nôtre souverain Seigneur & Maistre ; il est Seigneur de nos vies & de nos biens. Fut present en sa personne haut & puissant Seigneur Messire &c. C'est un Seigneur titré & qualifié. Nosseigneurs les Prelats. Nosseigneurs du Parlement. On appelle l'Empereur d'Orient, le Grand Seigneur. Ce mot vient de Senior. Nicod, Gregoire de Tours, & plusieurs Auteurs anciens ont appellé Seniores, les Gentilshommes & Grands Seigneurs.SEIGNEUR, se dit aussi de celuy de qui releve une terre ou un fief qu'on possede, & de la qualité de celuy qui possede un fief. Ce Gentilhomme est Seigneur du village. Cet autre est le Seigneur dominant. On doit la foy & hommage à son Seigneur, la bouche & les mains. Quand on denie un homme à son Seigneur, cela emporte commise, ou confiscation du fief. Un Seigneur Haut Justicier, un Seigneur de Parroisse. Un Seigneur Censier, qui n'a sous luy que des rotures. On appelle les Grands Seigneurs du Royaume, ceux qui ont plusieurs terres & seigneuries. C'est un Seigneur de marque, fort qualifié. Un Seigneur subalterne est celuy qui possede un arriere-fief. Seigneur lige & prochain, qui est le Seigneur immediat. Seigneur foncier, qui est maistre du fonds.SEIGNEUR, se dit en termes de Droit de celuy qui est maistre & proprietaire d'une chose. C'est un stellionat de vendre quelque bien meuble ou immeuble dont on n'est pas seigneur & proprietaire, qui appartient à autruy. On appelle Seigneur direct, celuy d'où releve la terre ; & Seigneur domanial, celuy qui en a le domeine utile. On dit aussi de la serge de Seigneur, en parlant d'une serge fine & luisante dont se sont habillés quelque temps des personnes de qualité.SEIGNEUR, se dit prov. en ces phrases. A tous Seigneurs tous honneurs. Nulle terre sans Seigneur. Tandis que le vassal dort, le Seigneur veille, c'est à dire, que le Seigneur peut saisir & faire les fruits siens d'un fief mouvant de luy, tandis que le vassal neglige de luy porter la foy & hommage. On dit aussi, Tant vaut le Seigneur, tant vaut sa terre, pour dire, que le revenu d'une terre augmente à proportion du soin qu'en prend le propriétaire. On dit aussi, qu'un homme fait le Grand Seigneur, qu'il a un train de Grand Seigneur, pour dire, qu'il fait le gros Monsieur, ou qu'il est glorieux ou superbe.