joute

Combat à cheval d'homme à homme avec des lances. Les festes & rejouïssances des Grands autrefois se faisoient par des joustes & tournois. Il y avoit des prix & des juges pour les joustes. Les Advanturiers & Heros des vieux Romains estoient en queste des joustes & tournois. Les joustes se font avec la lance & on jette le dard au tournois. Les Espagnols ont pris ces exercices des Maures, & les nomment le Jeu des cannes, parce qu'ils se tirent en tournoyant des cannes les uns contre les autres, & se couvrent de leurs boucliers pour les recevoir. C'est le vray jeu de Troye que la jeunesse Romaine pratiquoit autrefois. v. tournois. La difference des joustes & des tournois est celle d'un genre à l'espece. On appelloit tournois, toutes sortes de courses & combats militaires qui se faisoient par divertissement & galanterie ; & les joustes estoient des combats qui se faisoient de prés avec la lance & l'espée. Le tournoy se faisoit entre plusieurs Chevaliers qui combattoient en trouppe ; & la jouste estoit un combat singulier d'homme à homme. Ce mot vient de juxta, à cause que les combatans se joignoient de prés pour se battre. Saumaise dit qu'il vient du Grec moderne zoustra.Les Batteliers en tirant l'oison font aussi des joustes avec des lances plattes par le bout pour se renverser dans l'eau.JOUSTE, se dit aussi du combat de certains animaux qu'on fait combattre l'un contre l'autre, comme des coqs, & des beliers.