offenser s'offenser

Choquer quelqu'un, luy nuire en sa personne, en ses biens, en sa reputation. Un homme se tient offensé, quand on luy enleve son bien de haute lutte, quand on luy suborne sa femme, quand on l'outrage en sa personne. Il y a des gens, hargneux qui s'offensent de tout. Excusez moy, je n'ay pas creu vous offenser, Je n'ay pas dit cela pour vous offenser.OFFENSER, signifie aussi, blesser, incommoder. Ce discours est scandaleux, est impie, il offense tous les gens de bien, il offense tout l'Estat, il offense les chastes oreilles. La trop grande lumiere offense la veuë. Le musc tout pur est si fort, qu'il offense le cerveau. Quand les nerfs, les membranes, sont offensés, on sent de grandes douleurs.OFFENSER, en termes de Theologie signifie, Transgresser les commandements de Dieu ou de l'Eglise. Offenser Dieu, mortellement, veniellement. La penitence est necessaire à ceux qui ont offensé Dieu.On dit proverbialement, qu'il n'y a que la verité, qui offense, pour dire, qu'il n'y a point d'injure plus sensible, que quand nous nous sentons coupables des choses qu'on nous reproche.