gentilhomme

Homme noble d'extraction, qui ne doit point sa Noblesse ni à sa charge, ni aux Lettres du Prince. Un vray Gentilhomme ne doit point manquer de parole, ne doit faire que des actions d'honneur. il est pauvre, mais il est bien Gentilhomme. un Gentilhomme a le privilege de n'estre jugé au criminel en premiere instance que par des Juges Royaux ; & en cas d'appel que par le Parlement les Chambres assemblées. Par la derniere Ordonnance de la Marine un Gentilhomme peut faire toute sorte de trafic sur mer, pourvû qu'il ne vende point en detail. Ce mot de Gentilhomme vient de gentilis homo, qui se disoit chez les Romains d'une race de gens nobles de même nom, nez de parents libres, & dont les ancestres n'avoient point esté esclaves, ni repris de Justice. Quelques-uns disent qu'il vient de Gentil ou Payen, à cause que les anciens François qui conquirent la Gaule, qui estoit desja Chrestienne, furent appellez Gentils par les originaires, parce qu'ils estoient encore Payens. Voyez Menage. Quelques-uns disent que sur le declin de l'Empire, comme tesmoigne Ammian Marcellin, il y eut deux braves Compagnies guerrieres, l'une appellée Gentilium, & l'autre scutariorum, & que par imitation on a fait les noms de Gentilhomme & d'Escuyer.On appelle Gentilhomme de nom & d'armes, Celuy qui porte le nom de quelque Province, Bourg, Chasteau, Seigneurie ou Fief noble, qui ont des armes particulieres, quoy qu'il ne soit point Seigneur de ces terres, comme prouvent Jean Scohier, Geliot & autres. Car tel est Seigneur d'une telle terre, qui n'a rien aux armes, lesquelles appartiennent à un autre qui n'a rien à la Seigneurie, veu que les armes ne se peuvent donner à une terre ou Seigneurie que par concession du Prince. D'autres croyent qu'un Gentilhomme de nom & d'armes est celuy qui porte un nom & des armes connuës, quoy qu'il ne puisse pas justifier les seize quartiers par quelque defaut d'alliance, & cela n'empesche pas qu'il ne puisse estre receu Chevalier. Premier Gentilhomme de la Chambre du Roy, est un des premiers Officiers de la Cour, qui est maistre de sa Chambre durant son année.GENTILHOMME SERVANT, c'est celuy qui porte les plats de la table du Roy, & qui sert à executer les commissions qu'il luy donne. Il y a aussi des Gentilshommes ordinaires chez le Roy, qui reçoivent ses ordres, & qui les portent où il leur commande.On appelle Gentilhomme à lievre, un pauvre Gentilhomme qui vit à la campagne du gibier qu'il prend.On appelle aussi Gentilhomme, un honneste domestique qui s'attache par honneur au service d'un Prince, ou d'un Grand Seigneur, qui n'a point d'employ particulier ni servile, quoy qu'il ne soit point noble. Il a envoyé son Gentilhomme faire un compliment à ses parents.On dit proverbialement, Faire troc de Gentilhomme, pour dire, Troquer but à but sans retirer d'argent. Il est Gentilhomme comme le Roy.