faible

Qui a peu de force. Il se dit au propre du corps des animaux & de ses parties. Les reins foibles. les jambes foibles, la veuë foible. ce malade est encore foible. ce fardeau est trop lourd pour des espaules si foibles. ce cheval est bien foible pour un limonnier.FOIBLE, se dit figurément en Morale de l'esprit & de ses parties. Un esprit foible, qui se laisse aisément persuader, qui ne peut soustenir les adversitez, qui se scandalise facilement. Une memoire foible, qui ne retient pas les idées qu'on luy a imprimées. une imagination foible, qui est sujette à des visions.On dit aussi, un esprit foible, pour dire, un imbecille. Et on dit aussi, une esperance foible, pour dire, qui est sans apparence. un âge foible, pour marquer l'enfance, ou la vieillesse. le sexe foible, c'est le sexe feminin. la chair est foible, c'est à dire, est sujette à succomber aux tentations.FOIBLE, se dit aussi des choses inanimées ou de quelques corps. Quand un arbre est trop foible, il le faut estayer. ce mur est trop foible pour soustenir une voute. une armée foible doit estre bien retranchée. une lumiere foible ou fort petite. une monnoye foible, qui est legere ou rognée. des armes foibles, des remedes foibles, qui ne sont pas suffisans pour nous deffendre, ou nous guerir.FOIBLE. s. m. Le principal defaut d'une personne ou d'une chose, l'endroit par où on la peut prendre plus aisément. Il faut connoistre le fort & le foible d'une personne avant que de luy donner de l'employ. on gagne les Princes par la flatterie, c'est leur foible. un Stoïque ne laissoit point remarquer de foible dans son esprit.FOIBLE, se dit quelquefois en bonne part des affections honnestes & loüables. Cet homme aime éperduëment sa femme, ses enfans, c'est son foible.FOIBLE, subst. se dit aussi des choses inanimées. Les Generaux vont en personne reconnoistre une place pour en descouvrir le foible. un bon Rapporteur a bientost connu le foible d'un procés.On dit le foible de la boule, pour dire, le costé où le bois est le plus leger. Dans la balance Romaine on appelle le foible, le costé où le soustien est le plus esloigné du poids qu'on veut peser, qui est attaché au crochet. On dit aussi dans l'escrime, le foible de l'espée, la partie qui est depuis le milieu jusqu'à la pointe.On dit au plurier, Il ne faut pas laisser opprimer les foibles par les puissans. Il faut prendre garde de scandaliser les foibles.On dit adverbialement, Le fort portant le foible, pour dire, Toutes choses estant compensées de part & d'autre.